Vučić progovorio na albanskom: “Sefer, jesam li dobro ovo?” (VIDEO)

Video snimak predsjednika Srbije Aleksandra Vučića kako čita dokument Centralne izborne komisije KiM na albanskom postao je viralan na društvenim mrežama i albanskim medijima.

Većina medija na albanskom jeziku izvijestila je o tom događaju još tokom konferencije za štampu predsjednika Srbije i predstavnika Srpske liste, a onda su uslijedili i komentari na društvenim mrežama.

“Vučić je iznenadio sve, čitao je na albanskom jeziku i šalio se sa albanskim novinarom tokom konferencije za štampu”, piše list Tema, jedan od glavnih listova u Tirani.

Albanski portal “Sot” piše da je Vučićev klip postao viralan nakon pisanja srpskih medija i da se širi najvećom brzinom.

Događaj je privukao ogromnu pažnju i na albanskim medijima na Kosovu i Metohiji.

“Predsjednik Srbije je juče pročitao dokumenta na albanskom i onda se okrenuo ka novinaru Tv Klan/Abc News iz Tirane i pitao ga ‘je l’ u redu Seferi?’, a onda je pohvalio novinara kako priča srpski, pa naveo da i on može da nauči po nešto albanski, ali da ipak nije pametan kao kandidati Nenad Rašić i Rada Trajković”, piše kosovski portal “Frontonline”.

Mnogi su komentarisali način čitanja predsjednika Srbije i to koliko tačno čita.

To je pokrenulo raspravu i u medijima i na društvenim mrežama o srpsko-albanskim odnosima i da li je pomirenje moguće, a u jednom od komentara se primijećuje da predsjednik Vučić razumije da se mržnjom ne može ići naprijed, mada uz napomenu – “u posljednje vrijeme”.

Predsjednik Srbije je u petak, na konferenciji za novinare, pročitao zaglavlje dokumenta CIK-a i našalio se sa dopisnikom TV Klan iz Albanije.