Probudila se djevojčica koju je otac bacio s terase

Najteže povrijeđena djevojčica, jedna od četvoro djece koju je njihov otac jedno po jedno bacio s balkona porodične kuće u Pagu u četvrtak, je pri svijesti i samostalno diše.

– Djevojčica je u uopšteno u boljem stanu. Više nije uspavana, probudila se i pri svijesti je. Sada samostalno diše. Moguće je da uskoro neće biti potrebe za intezivnim liječenjem nego na nekakvom normalnom odjeljenju. Što se tiče operacija u području preloma lobanje i usta, to će se odlučiti u narednim sedmicama. Sada nije nužna operacija – rekao je doktor Toni Matić s KBC-a Rebro, prenose Vijesti.hr.

Troje djece od tri, pet i osam godina, koji su na liječenju u Opštoj bolnici Zadar, dobro su i oporavljaju se prema očekivanjima, potvrdio je u subotu Hini Edi Karuc, zamjenik direktora zadarske bolnice.

Portparol Opštinskog suda u Zadru Denis Klarendić kazao je Hini da je Josip Rođak (54), otac koji je pokušao ubiti svoje četvoro djece, u septembru 2017. godine nepravosnažno osuđen na Opštinskom sudu u Zadru na kaznu zatvora od jedne godine s rokom kušnje u trajanju od tri godine zbog krivičnog djela protiv braka, obitelji i djece te zanemarivanja i zloupotrebe djetetovih prava.

– Na istu kaznu zatvora osuđena je i njegova supruga, majka djece. Budući da se na prvostepenu presudu nisu žalili, ona je u novembru 2017. postala pravomoćna – rekao je Klarendić.

Josipu Rođaku juče je određen jednomjesečni istražni zatvor zbog uticaja na svjedoke i opasnosti od ponavljanja djela te radi neometanog odvijanja kaznenog postupka zbog posebno teških okolnosti krivičnih djela.

Protiv njega vodi se postupak zbog osnovane sumnje da je počinio krivična djela teških ubistava u pokušaju, za što je hrvatskim zakonom propisana kazna i do 40 godina zatvora.