Heroj Hrvatske nakon Japana: Najveći trenutak u mojoj karijeri
Livaković je odbranio tri penala i jedan je od najzaslužnijih što se Hrvatska treći put plasirala u četvrtfinale Svjetskog prvenstva
Golman hrvatske fudbalske reprezentacije Dominik Livaković, koji je danas odbranio tri penala protiv Japana u utakmici osmine finala Svjetskog prvenstva, rekao je da je to najveći trenutak njegove karijere.
“Izuzetan je osjećaj. Hvala bogu da se dobro završilo. Visoko su pritiskali od početka meča, što je bilo teško. To je najveći trenutak u mojoj karijeri”, rekao je Livaković poslije utakmice za državnu televiziju.
Hrvatska se plasirala u četvrtfinale Svjetskog prvenstva, pošto je poslije jedanaesteraca pobijedila Japan sa 3:1, nakon što je u regularnom dijelu utakmice i poslije produžetaka rezultat bio neriješen 1:1.
Livaković je odbranio tri penala i jedan je od najzaslužnijih što se Hrvatska treći put plasirala u četvrtfinale Svjetskog prvenstva.
Njegov saigrač Nikola Vlašić rekao je da je izvođenje jedanaesteraca sastavni dio fudbala.
“Natjerali su nas da se mučimo, ali mi smo to znali. Nisu slučajno pobijedili Njemačku i Španiju. Znali smo njihove prednosti i mane. Dominirali smo. Penali su sastavni dio fudbala. Ja sam zadovoljan. Imali smo više šansi i vjerujem da je trebalo da pobijedimo (prije izvođenja penala)”, naveo je Vlašić.
Hrvatska će u četvrtfinalu igrati protiv pobjednika večerašnjeg duela Brazila i Južne Koreje.
U četvrtfinalu će igrati još: Argentina – Holandija i Engleska – Francuska.
U utorak biće odigrane preostale dvije utakmice osmine finala: Maroko – Španija (16.00) i Portugal – Švajcarska (20.00).
