Gdje su i šta danas rade pripadnici zemunskog klana (FOTO)

Zemunski klan ni danas nije prestao da postoji, ali od njegove prve postave, koja je organizovala ubistvo premijera Zorana Đinđića, svi su u zatvoru ili su pokojni.

Hapšenje Mlađana Mićića Pacova, saradnika zemunskog klana, zbog prebijanja kćerke, podsjetilo je mnoge na ozloglašenu kriminalnu grupu, odgovornu za ubistvo premijera Srbije Zorana Đinđića 2003. i niz drugih zločina te otvorilo pitanje gdje su sada kriminalci iz mračnog zemunskog klana, piše Blic.

Većina prve postave klana je u zatvoru ili je ubijena, a jedini iz ove ekipe smrti koji je i dalje na potjernici je Ninoslav Konstantinović Nine, čija sudbina nije razjašnjena. Potjernica za Konstantinovićem raspisana je nakon ubistva premijera Zorana Đinđića 12. marta 2003, ali se sumnja da je ubijen iste godine. Sretko Kalinić, koji je bio glavni egzekutor klana, policiji i tužilaštvu je ispričao da je Konstantinović ubijen i da je njegovo tijelo zakopano u njivi u blizini autoputa Beograd-Zagreb, ali ono nije pronađeno.

Na slobodi je iz prve postave najduže bio Vladimir Milosavljević – Vlada Budala, koji je uhapšen 9. februara 2012. u Valensiji. Sa njim je tada uhapšen i Luka Bojović, koji je označen kao novi vođa klana.

Inače, Bojović nije bio obuhvaćen nijednim postupkom protiv zemunskog klana koji je vođen nakon ubistva premijera Đinđića. On je uhapšen u Srbiji 2007. i na teret mu je stavljen čitav niz krivičnih dijela, ali je osuđen je samo na 15 meseci zbog falsifikovanja dokumenata i oružja. Pušten je iz pritvora u aprilu 2008, otkad je bio u bjekstvu do hapšenja u Španiji februara 2012.

Osim za ubistvo premijera, protiv pripadnika zemunskog klana u Specijalnom sudu vođen je jedinstveni postupak za 17 ubistava, tri otmice i dva teroristička napada – na preduzeće Ljubiše Buhe Čumeta “Defence road” i bombaški napad na sjedište DSS.

Za otmice Miroslava Miškovića, Dragoslava Vukovića i Milenka Aleksića tokom 2001, vođen je odvojeni postupak koji je okončan pravosnažnom osuđujućom presudom okončan u junu 2010. Vođen je i poseban postupak protiv “podmlatka” klana, poznatog kao “pajser brigada”, koju je 1998. osnovao Dušan Spasojević Šiptar da bi mučio narkomane koji ne bi na vrijeme platili svoje dugove za drogu. Ovaj postupak je okončan osuđujućom presudom već 2005.

Ni sa hapšenjem Bojovića 2012. u Španiji klan nije prestao da postoji, a vodstvo je, prema operativnim podacima policije, preuzeo Filip Korać.

Ime klana često se spominjalo od 2009, kada je počeo sukob sa grupom Slobodana Šaranovića, koji je ubijen 11. marta 2017. u Budvi. Ovaj sukob odnio je više života. Međutim, policije više balkanskih zemalja nisu našle nijedan dokaz koji tereti Koraća, pa je on na slobodi. Jedino je na kratko priveden u avgustu 2016. u Zvorniku i ispitivan oko ubistva Čede Đokića, ali je odmah pušten.

Luka Bojović

Luka Bojović i Vladimir Milisavljević Budala su u novembru 2015. pravosnažno osuđeni u Španiji. Obojica su dobila po 18 godina zbog kriminalnog udruživanja i oružja, a Milisavljević je dobio još četiri godine zbog prikrivanja ubistva Milana Jurišića Jureta.

Španski sud je utvrdio da je Jurišić ubijen, a njegove kosti su pronađene u rijeci u Madridu. Međutim, Milisavljević nije otkrio ko je od “zemunaca” ubio Jurišića, pa niko nije osuđen za ubistvo.

Jurišić je bio u prvoj postavi klana i takođe je u odsustvu osuđen za ubisto premijera i druge zločine. Njega su ubile kolege iz klana, raskomadale, samljele na mašini za mljevenje mesa i ostatke bacile u rijeku. Kako su pisali španski mediji, “zemunci” su od Jurišićevih ostataka čak skuhali i gulaš, zbog čega su u španskim novinama nazivani “Srbi kanibali”.

Braća na čelu “Pajser brigade”

Pripadnici “pajser brigade”, podmlatka zemunskog klana, osuđeni su 2005. zbog rasturanja droge i prebijanja narkomana koji su dugovali novac. Kao vođe osuđeni su braća Dušan i Đorđe Krsmanović te Marko Adamović. Dušanu, koji je uhapšen u vrijeme “Sablje” 2003, suđeno je i zbog ubistva premijera i drugih zločina klana.

Đorđe je uhapšen 23. maja 2007. u zgradi Specijalnog suda, kada je došao da pruži podršku bratu. On je uhapšen po potjernici jer je osuđen i zbog iznude. Adamović je aprila 2008. pronađen mrtav u zatvoru u Sremskoj Mitrovici gdje je služio kaznu.